الخميس - 28 مارس 2024
منذ سنتين
الخميس - 28 مارس 2024


د. قاسم بلشان التميمي ||

تنبيه هام جدا ( حديث الكوستر هو نقل لهموم الناس واحاديثهم في سيارة الكوستر والكيا و المقهى و في البيت والمستشفى واماكن العمل وحتى فوق القمر !! ، بمعنى هو حوار من صميم وضمير الشعب ، لذلك لاتوجد ضرورة لقيام البعض بالتهجم والتقليل من شأن هذا الحديث ، لأنة وبصراحة متناهية هو حديث الشعب العراقي وهذه هي الحقيقة ، لذلك يجب علينا ان لا نتجاهل هذه الحقيقة) مع تحيات سائق الكوستر فرحان الغضبان
وبدأ حديث الكوستر مع صوت فرحان الغضبان مخاطبا الركاب( عمي شو الكل نايم ويشوخر ما دكلولي شنو السالفة) وأضاف فرحان الغضبان ( يابه هي كوستر مال نقل ركاب قابل هي فندق ) ، فرد عليه احد الركاب بالقول (عيوني فرحان الناس نايمه بالكوستر لانه ما تنام فب بيوتها من الحر ) ، فرد عليه فرحان الغضبان ( يابه صح ما ينامون وصح كهرباء ماكو والله يساعد الناس ، بس ما يصير واحد ينام بالكوستر ، لازم الواحد يراعي مشاعر الاخرين ) ، وتكلمت امرأة من الركاب وقالت ( خاله فرحان والله كلامك صحيح ، بس عندي ملاحظة وهي لعد ليش هم ما يراعون مشاعر الناس ، وليش ما يراعون مشاعر الاطفال والعجايز والشياب ، ليش كاطعين الكهرباء علينا ، من يكون الله لا يوفقهم لادنيا ولا اخره ، ليش يمه ليش أريد واحد يكلي شنو ذنب هذا الشعب ) ، فقاطعها فرحان الغضبان بالقول ( حجية هذا شنو الكلام ، المهم هم عدهم كهرباء وعدهم بيوت مريحة وسيارات حديثة وفلوس حتى يفكرون صح ويخططون صح وينفذون صح كل الخطط على هذا الشعب المسكين ) ، فقالت له المرأة ( يعني شنو يخططون وينفذون ، يمه فرحان هم كل تخطيط ما عدهم ،هم ينفذون ما يخطط لهم غصبا عليهم وعلى ابو ابوهم وو ) ، فرد فرحان الغضبان عليها بالقول ( يابه كافي حجية رجاء اسكتي ) وانتهت حلقة اليوم بعد ان ردد فرحان الغضبان مع نفسه ( والله ياحجية كلامك صحيح وصدك هم عبارة عن ادوات تنفذ خطط الغير للاسف ،وما ادري أشوكت ومتى تصعد عدهم العراقية ويصحون على انفسهم لاجل أهلهم )