مقالات

وطنچية باب الشرجي !


باقر الجبوري ||

كلنا ندري ان الاخ السني او الشروگي او حتى الكردي من سكنة الوسط او الجنوب انه ما يگدر یدخل الى اقليم كردستان الا بعد الحصول على اقامة وباج ( ويندگ حاسبة ) !
يعني يفرون راسه فرررر !!
وطبعا الجماعة يگولون ان هذا الاجراء هو للمحافظة على امن الاقليم !!
كلش حلو وعلى راسي !!!
بس عندي سؤال !!
زين هاي المعسكرات والمكاتب والقوات العسكرية المسلحة والعجلات المحملة بالاسلحة الثقيلة وهم من غير العراقيين ( ايرانيين ) !!
شعجب يصولون ويجولون في اقليم كردستان العراق بدون لارقيب ولاحسيب !!
لو هم عدهم ( گرين كارد ) لو شنوا !!!
زين هاي الاجهزة الامنية الكردية التابعة للاقليم والتي يستقتل الاقليم للحصول على رواتب لهم من خزينة الدولة !!
هذولة شنو شغلهم وشنو دورهم لو مثلهم كمثل ( فحل التوث بالبستان هيبة ) !
والله عجيب ..
لا … والنوب تشوفهم بالفيدوهات في وقت الضربات الايرانية على معسكرات الارهابيين بالاقليم يطلعون يبچون مثل النسوان عليهم ويسحلون بيهم من الانقاض ويعالجوهم بمستشفيات الاقليم وكله ابلاش !
هسه كل هاي بچفه وجماعتنه اللوگیه بچفه !!
يهوسون ويطبلون للحرب ( یاگاع ترابچ کافوري …منافقين حيشاكم ) ويطلعولك بسالفة ( چااا ) هو ليش مايطب الح..شد للاقليم ويدافع عن كردستان !
هسه هاي ما ادري تنحسب وطنية لو دونية لو عمالة للسفارة الامريكية بحجة الجماعة يحنجون لكردستان !!!!
زين كردستان مو دولة وعلم وعلى اساس كانت نيتهم ينفصلون ( چاااااا ) مايحمون ويدافعون عن دولتهم ( كلامي عن الساسة )
لو بس يعرفون الح..شد بوكت الغمة !!
والله اني رأيي مع ضرب هذه القوات التي تدار من قبل امريكا واسرائيل وابصم بالعشرة على ذلك !!
وكون ايران تسلگهم سلگ بالمسیراااات !
لاتتعجب انا الوطني الحقيقي فضرب هؤلاء يصب بمصلحة العراق ووحدة العراق ومستقبل العراق !!
يا جماعة الخير انتو تدرون ان كردستان البرزاني مستقوية علينه بهذول الارهابيين ومشغلتهم علينة سچينة خاصرة بحكومة الشيعة !
يعني مو بس على ايران !
لا والاكثر من هذا انه مستقوية بيهم على الاكراد العراقيين في الاقليم ..!
تدرون لو ما تدرون !
لا حبيبي ياكلون بيهم عالفچين ولهذا السبب محترگ تنورهم وشابة نارهم ( الاكراد والسفارة الامريكية والحجية بلا سخارت واسرائيل والجامعة العربية وجماعتنة الدونية )!
على اساس حنينين عالعراق !
والله حيل وابو زايد !!
همه والي يدافع عنهم !
والي يسوگ المطي يتحمل ……
تحياتي …


ـــــــــــــــــ

عن الكاتب

باقر الجبوري

اترك رد إلغاء الرد

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.