الأربعاء - 21 فيراير 2024

السفارة في “السفارة”والسفيرة كلش ماخذة راحتها

منذ 9 أشهر

إياد الإمارة ||

لا يابة لا..
لا عيني لا..
لا يا بعد روحي لا..
وهماتين الساع نحچي ونكتب ونعلق ونجرجر بالسوالف بين العگود..
زين يابة والعينتين من الدعش بالليل للدبعة الصبح يكووود بالشغل..
والبِلبِل وسوگ الغزل والخاتون والجري والتمن الأحمر..
وما راح يكون عدنا خط أحمر ونوجة للضوة و نعلگها للشمعة وخل تعلگ!
شو السفيرة “المسعدة” هواي ماخذة راحتها!
تلتقي بالوادم من الچبير للصغير..
وتصرح وتدعو وتوجه وتشارك وعبالك العراق اقل من ولاية أمريكية!
شنو هاي السفيرة؟
معفية من “الگمرگ” والضريبة والعتب..
وتطب محد يحس بيها وتطلع محد يحس بيها والجماعة مرتاحين للشغلة!
گلنة شغلة “بلاء سخارت” أُم المثلية خفت، طلعت علينة السفيرة أُم المساواة الجنسية بمكانها!
يعني نطلع من حفرة ندخل بنگرة؟
لو شنو؟
واكو فد سالفة شوية غمة..
طولوا بالكم علينة يا جماعة “الكواليس” والخنة بالحچي والفرة منا ومنا وبالجامعات!
عود ليش العراق من قال وبلا تتحكم بيه النسوان؟
وقبل لا تتمرجل علي الشوارب أريد اذكر “الوطنچية” بالمسعدة “بيل” ودورها بتشكيل الحكومة العراقية الأولى عام (١٩٢١) وشلون رجل الدين -ولا يروح بالكم بعيد- عبد الرحمن النقيب دائماً يگلهة: نسألكم الدعاء!
وهم بعد طولوا بالكم علي شوية..
مثل ما مطولين بالكم على السفيرة المسعدة..
ومو بس “بيل” الخاتون حكمت هذا البلد .. لا عيني، وغلاته للبِلبِل المسعدة بلاء سخارت أُم المثليين وحقوق المثليين هواي هم حكمت البلد، لو أنا غلطان؟
هم چانت تحكم مثل ما “بيل” الخاتون تحكم وهم نسألها الدعاء..
والي شايف غير هذا أنا بالخدمة وداعتها للسفيرة “الشگرة” الخاتون الجديدة..
طبعاً الحچي رومانسي..
والجو رومانسي..
والجو بديع..
والدنيا ربيع..
وقفلوا كل المواضيع..
يعني شلون؟
يعني “الخضرة أم الليف وأم الكذا” موجودة وخاف اكو منا منا نچقة للبِلبِل..
والچقة شبر..
تعرفون شنو الچقة شبر؟
لاعبين دعابل قبل؟
لا هواي يعجبني وتشوفة تگول چلب -حشاكم- وعاض ليفة.


ــــــــــــــــــــــ