السبت - 15 يونيو 2024
منذ 9 أشهر

سعيد البدري ||

قالت العصفورة ( يا طلابة العصفورة ) اليجي يگول قالت خو انته (قول) ليش باليها بشرك وتحچيها كذب وهي محاچيه المسكينة..
قلت انا ومن حقي اقول ،يمكن والله العالم تضحكون مدري تبچون ؟؟
اولا هذا الي نحچي بيه يندرج ضمن بند حسد العيشه و حسب المادة اولا من قانون گهوة الماعدهم شغل وعمل ،اي وداعتكم اكو بند بالقانون بس اسمه يختلف ومضمونه حسد العيشه !!
قبل كم شهر اكو كاتب تعبان على نفسه يسكن ببلد اجنبي شقيق خلف ما وراء البحار ،دزوا عليه الويلاد المستشارين الاعلاميين بمهمة محددة ليشتم خصوم العنوان س او ويتملق المسؤول ص ،العملية بسيطة بس مو اي واحد يعرفلها لاتصورون سهلة ، المهم الخير چثير وهاك يبعد بيتي هذني 5 الاف دولار راتب شهري و وياهن مكافأة ترحيب ( حگ العرگات ) ،مو لاجل شي بس لأجل صحتكم يا غوالي!!
ليش مستغربين الرجال يريد يعدل مزاجه، حتى يعرف يشتم ويتملق زين ويحلل عرگاته ،ويدعي الخيوريه وينتچي ويسفط براحته، ما اعتقد من حقكم تعترضون اولا لان ما من حق المواطن يعترض عالمصلحة الوطنية والوئام بين المكونات ،وثانيا لأن عايف حقول الورد و نهاية موسم قطاف الزهور ببلده الحلو الملفيه ،وجاي لبلده الام (الچوله ) خو ما يجي ويروح ويمسح ايده بالحايط ببلد المليارات ، اسبابه انه جاي فزعه لأجل يواسي اهله العراقيين ويدافع عنهم وهذا واجب وطني ،موبالله !!
لاحسبالكم هو يشرب بطران مع انه ايضا ما من حقكم تناقشونه وهاي حرية شخصية بوطنه الجاي منه ، وحرام بوطنه الام وهو ما يشرب گدام الناس يعني الموضوع ،اذا بليتم فأستتروا ،وانتم ما محلفيني يشربه ب( القندره ) حشاكم ويحلف بالمقدسات وهو سكران و ابدا لا يروح بالكم بعيد !!
الحقيقة ما اعرف شلون اكمل الموضوع ، لان ما اريد گلوبكم تنكسر ، ثقوا الرجال مقهور عالشعب وداعتكم هيه هاي الحقيقة !!
ممصدگين بكيفكم بس يگولون اذا حچيت دني شاهدك ، والخير الجابه قبل هاي الدورة الحكومية حي يرزق وما عنده مصلحة يچذب هسه ( ما اعرف منو رازقه ) لان الله سبحانه وتعالى يرزق ويحرم النهب ،المهم صاحبنا ذاك غرگان بالنعمة لان وجه صاحبنا هذا كله خير وهاي من بركات الاستقامة ، الرجال راح يجاوبكم شلون اجه هذا الوطني الغيور وخطيه محصل شي حتى مقاولة لصاحبه اليسكر وياه !! مع انه يستاهل ، لأن خوش ولد ويعرف يشتم ،ولأن صاحبه هم يستاهل بدل المقاولة عشر مقاولات ،صدگوني ما كذبت عليكم !!

مستشارينا عظماء ومايسوون شغلة الا وبيها ضربة احتراف ، يگولون دع الخلق للخالق وهو هذا الصحيح !!
وايضا احنا نعيش بظل الديمقراطية و من گد ما الشغلة ديمقراطية وشفافة ما بيها اسرار ، فالامور ماشية بمنتهى الديمقراطية ..
شنو اجه ببالكم ،لا لا سوء الظن حرام وانتهاك حرمة السكارى والسرسرية من اكبر الكبائر وصفة نفاقية وما يجوز !!
صدگوني أنتم ما تعرفون مبرراتهم واسبابهم ،ولو عرفتوا الاسباب الحقيقية تعذرونهم !!
المهم ما علينه بالوادم !!
ترا لا حسبالكم حاسد الرجال وادور وراه وللامانة قياسا بغيره فهو نزيه لان ما اشتغل وي واحد وعاف واحد،جدا مبدئي ويشتغل لليدفع اكثر وادسم ، بعد بيه ميزة انه ما لزم سلاح ولا شال قامه وابتز واحد ابدا لا قبل ولا هسه ،هو بس يشتم ويتملق ..
ما اعتقد اكو قانون يعاقب عالتملق ؟؟
اگللكم تعالوا تعالوا … .
ليش انتم مواطنين ظنكم سيء وما تقدرون المصلحة ، وداعتكم هذا لأجل مصلحتكم ومصلحة الوطن ،بعدين عيب هذا ابن بلدكم شنو يعني 5 الاف دولار قحط !!
انتم مو تگولون انكم مواطنين شرفاء !! چا ليش تسمعون الغيبة ،باجر الله يذبكم بالنار ..
هالمره طايحه ،مرة ثانية لا تفكرون بهاي الطريقة ،ومعذورين بعدكم ما تعرفون النظرية المعرفية خل ياكلون ما طول خالهم وعمهم وجدهم طيب لصاحبها صفوگ ابو الفتوگ !!
و اكثر الظن فاتكم نص عمركم لان ما حالفكم الحظ لاستيعاب تطبيقات نظرية البيه زود يطلع نقش !!؟