ال (د.) مو شرط دكتور إحتمال غير شيء..!

إياد الإمارة||

مو شرط دكتور ..
لعد؟
إحتمال يطلع “دماغ سز” ..
هذا ما قاله أخي الشيخ المطلع الحصيف..
وأنا أتفق معه كثيراً ..
أتفق إن بعض الدال المنقوطة إشارة إلى كلمة “دماغ سز” حشاكم ..

أين نجد عقدة “الدال”؟
بصراحة نجدها عند “الذال” ..
لا تستغربوا فهي متجذرة عند “الذال” نفسه من السياسيين والدينيين..
من بعد كلمة “الحقوقي” وشهادة من الخارج تزوير لو من جامعة نص ردن، من بعد هاي الكلمة تطورت العقدة وصارت عقدة “الدال” من “الذال” روحة يدور منصب وجاه ووجه..
السياسي الدكتور لو الشيخ الدكتور والجامعات بفلس..

يابة السياسي الدكتور لو الشيخ الدكتور غير يقدم شيء؟
يعرف شيء؟
لو هي الشغلة “تلفلف”؟
شاهدي:
كم سياسي عنده فلوس وجاه ووجه ويريد برستيج فراح على “الدال”!
وكم ديني عبالة من يكولون الشيخ الدكتور راح يصير الشيخ الوائلي رحمه الله.

عقدة “الدال” من “الذال” روحه هواي مبينة بالإنتخابات ..
بحيث واحد من كد ما كاشخ بيها صار يقول:
دلوا على محمد وآل محمد، عود صلوا!
اما الدعش والدعش وربع فهاي بفلس..
شنو السالفة؟
أنتَ السياسي ابو الدال شو صرت وزير وما أعرف شنو صرت وخيستك عبرت الراس والذيل ووصلت لبيت جيرانكم ..
وأنتَ الديني الشيخ أبو عراوي “الشيخ الدكتور” شمسوي؟
مؤلفاتك تُدرس بيا مكب نفايات؟

الدال مو شرط دكتور نوبات “كثيرة” تطلع دماغ سز.