الأربعاء - 22 مايو 2024

على حس الطبل خفن يرجلية..!

منذ أسبوعين

عمار الجادر ||

ما جنت اعرف شنو تعني العبارة اعلاه؟! لكن بمرور الزمن وبعد الادراك العقلي، شفت ان العبارة هي حكمة علمية! شلون؟! تعال ابينلك.
هم شايف الاستعراض العسكري؟ شايف شلون الاهازيج ونغمات الدمام تأثر علة المسير، حتة لو ما شايف، اكو مقطع على اليوتيوب!!! ما شاء الله، اهنا فكيت حلكك من ذكرت ( اليو تيوب) ليش؟! وشنو علاقتة بالحلك، تعال اكلك بس علكيفك وياي لان الحجي هواي.
سبحان الله، قد خلق منظومة متكاملة للإدراك، عندما تسمع الاذن نغمة معينة، تبعث الى العقل اشارة، وبالتالي العقل يسير الاطراف الحسية، كالبصر والاقدام والايدي والفم والعين، ولكن العجيب ان استغراقي من الوقت لكتابة هذه الكلمات هو 15 ثانية، بينما العملية تتم فعليا باقل من اجزاء الثانية ودون شعور بها حتى.
لذلك انتة حين ما قريت المقاطع الاولى من المقال، لم تتضجور من طولها، بل مرت عليك مرور النسيم، اما عندما قرأت المقطع الثالث قلت: ( اهو كاتب جريدة)! بس علة كيفك وياي لان الشغلة تفيدك.
شهر رمضان، يعني شهر ( الله )، انفاسكم فيه تسبيح! تكدر تحدد النفس مالك بوقت؟! يعني شكد تسبح لله انت وانت صائم؟! اكثر حتة من الملائكة اللي قالوا: ( ونحن نسبح بحمدك ونقدس لك)، اها!! تقبل الله ايمانك وطاعتك، اهنا مربط الفرس.
ليش شهر رمضان اللي هو شهر الله، يكون محط للبرامج التلفزيونية والترفيهية البعيدة عن الله؟! هسة تكول : (( اهو راح يجيبنة علة المؤامرة))، انتة احسن من ( ادم)؟! طبعا لا، خوش مو ادم تامر علي عدوه الشيطان وطلعة من الجنة، و ادم ابوك أنته الادمي، اعتيادي الشيطان ما راح يخليك تتنعم بشهر الرحمة، شلون؟! اني اكلك.
انتة قاري بالقران ( لو سمعوا تجارة او لهوا انفضوا اليها وتركوك قائما)؟! قاريهة اكيد وبقلبك تكول ( والله مجتمع تافه) مو؟! زين تعال ابينلك انتة كاعد تسوي مثلهم، شلون؟!
1- نفسك البي تسبيح لله اهدرته في المقاهي، بين ( الدومنة والمحيبس ) جا شحسبالك الشيطان يعوفك؟! زين شلون اعيد الترتيب؟! زور رحمك يا اخي، سوي مسابقة بفهم القران، اكعد وي اصدقائك وسولف بالخير، صعبة مو؟! لان الشيطان يريد يصعبهة.
2- عينك وقلبك، يم مقطع فديو لواحد ناشر ( بعد الافطار ) وكرشة شكبرة! لو شكالت ال ( ام بي سي) وانتة تسمع وتشوف ابداعات الشيطان! لدرجة انو مسلسل جاب طاري ( مهدي ابو صالح) و ولا جنك! ليش؟! لان هذا الاسم لخليفة الله اللي بسببة الشيطان انطرد من الجنة!
3- رجليك تاخذك وين ماكو حس طبل، بس من تسمع اكو جلسة رمضانية، تتعب وتتضجور وتريدهة تخلص شلون ما جان! مثل ما هسة احسك ضجت من مقالي اللي قرائتة ما تستغرق دقايق، ومتشوق حتة تشوف الخبل ( اياد راضي) وهو حاط الشماغ مال البخت بالامية ويضحك عليك وعلية.
عجيب والله؟! انتة الشيعي اللي تخدم وتتعب 40 يوم لمحرم، ما تهتز وتثور علة قرقوز يسمي روحة ( ما اكدر احجي) لان هذا الاسم لخليفة الله في الارض، الامام الذي يصوم وحيدا ويكون لك عونا في الشدائد، وما قتل الحسين واستحل منه ما استحل الا لآجل هذا الخليفة الموعود!
شبيك؟! لا تصير علة حس الطبل خفن يرجلية، انت العاقل فلا تستهويك طبولهم.