ولا مره نخيته وگال متصير..!

بهاء الخزعلي ||

ولا مره نخيته وگال متصير
وعلي العباس كل صعبه يحلها
ويجي البطران يسألني الدمع ليش
ولك لو بيدي حتى أجفوفي أهلها
هم سامع بشر من قبل ألف عام
يجي بهيبته وروحك يستحلها
مو بالطف وثائر ،كل الأزمان
براكين الأرض من رأسه أصلها
وعلي بي غيره مو بس لأخته
للناس الماشايفها هم يدافعلها
وأظن البالقدس لو تنخه عباس
يفز من كربله وهم يفزعلها
كل السنين تمشي وباقي عباس
قائد كل حرب ثق يجبللها
من العلگمي وللحوثي مد أيد
بوارج بالبحر جفه يذلها
من نهر الفرات لباقي الأنهار
مثل ثار العشاير عمملها
ومن الخيمه لخيام بفلسطين
يمد جوده أعلى كل أم وطفلها
والعين بالعين وسهمه بالعين
وهذي الحكمة واجب نستغلها
ولأجل عينه فصائلنه ترد ثار
و عين الأسد ثق نعميها كلها
و من كطعو يمينه النوب الشمال
رساله مشفره و رايد نحلها
فهم نصر الله گال أنحلت هنا
كل أرض الشمال تصوصي أخلها
على مر الزمن موجود عباس
وذوله أبنائه التقاوم و أهلها
بالطف جفه بس وحد الساحات
لأجل القدس خلف زلمه كلها
وما مات اليخلف مثل مگيول
لجن عباس طبقها بفعلها

كل ما أكتب فهو قليل بحق سيدي ومولاي أبا الفضل العباس عليه السلام بقلمي المتواضع أرجو من الله سبحانه وتعالى القبول وحسن الخاتمة.