تسريبات الخنجر ( كذبة نيسان )..!
باقر الجبوري ||
..فالمطلوب الان أن نكتب عن تلك الجريمة وتلك الوقاحة ونحشد الطائفة ونحرض الشارع وان نخرج بمظاهرات عارمة وان نمنع الخنجر وولده من دخول بغداد !
اي وبعدين !!!
لابعدين ولاهم يحزنون !
أخذوها مني ( ماكو فايدة ) لان بس راح نخسر وقت وجهد وحرگان اعصاب وبالتالي يطلعون الجماعة متفقين علينا !!!
الخنجر .. يسب الشروگية گدام ربعه السنة حتى يركضون وراه وينصبوه قائد بحجم خالد ابن الوليد لان الجماعة ما يتقبلون حكم الشراگوة وهذا راح يفيد الخنجر بالانتخابات الجاية ( يعني راح يستفاد من التسجيل اكثر مما يخسر )!!
وحجي فلان .. راح يقدم دعاوي ومحاكم ويطلع يخطب خطابات نارية بحجة انه المدافع الوحيد عن الشروگية حتى تنتخبه الطائفة لان صار من زمان ما سامعين همبلة وهوبزة بروس الشعب !!
وبعدين يطلعون بالاعلام ويگعدون سوية يشربون چاي وماي وگهوة ويتمضحكون علينا ويسدون القضية !!!
ويتفقون عالكيكة من تقسيم الأراضي ولاإستثمارات ومزاد بيع العملة وحصص التعيينات والمناصب والمهم ان يتحالف فلان السنس وياي فلان الشيعي ضد فلان الشيعي !
صارت السالفة ماصخة كلش كلش !!
ابراهيم الصميدعي قبل فترة طلع بالاعلام يگول اني گعدت وي العيساوي حتى اوصله رسالة من ( حجي فلان ) الشيعي انه سيحول قضية العلواني الى قضية عشائرية وانه مستعد لتبرئة حماية العيساوي من تهم الارهاب بس يبطلون من سالفة المظاهرات ولكن طب علينا احمد ابو ريشة وخرب السالفة !!!
بالتالي طلعوا حماية العيساوي براءة وسكتت الحكومة عن ابو ريشة وطلعوا مظاهرات وحرگوا الانبار وسقطت محافظات واستشد الاف الجنود والضباط حتى يرجع الامان للعراق !
وبالتالي الضباط والمراتب ناموا بالممگابر !!
والخنجر والعلواني وابو ريشة والعيساوي طلعوا براءة كبراءة الذئب من دم ابن يعقوب !!
يعني السالفة مو قانون ونظام ودولة !!
السالفة واگفة على حجي فلان وحجي فلتان و( بوس عمك .. بوس خالك ) ودم الويلاد واگع جوة الفراش وحتى نلتاف عالقانون نعتبر ( الواقعة ) دون قصد جنائي حتى نخصم القضية وي شيوخ العشاير وبالتالي يطلع الفصل من جلد الحكومة لان الوقف السني هو راح يدفع الفصل من خزينة الدولة !!!
بالتالي رجع العيساوي والعلواني طلع بالعفو وهو قاتل لجنديين من الفرقة الخاصة !
هاي شني هاي … والله ما أدري ابچي لو أضحك !!
حبيبي لاتتعجب اذا سمعت ان طارق الهاشمي والجنابي وقادة الارهاب كلهم رجعوا للعراق ولا تتعجب اذا تسلط هؤلاء على القادة والضباط الذين كانوا يحققون في قضاياهم!!
والمشكلة الشيعة بعده لحد الان ماتعرف راسه من رجليها ومنوا الشاريها ومنو البايعها!!
هم صحيح .. فالمهم الوحدة الوطنية واللحمة الوطنية !
صح لو لا حبيبي !
تحياتي … باقر الجبوري
اقرء ايضاً
